Valbjörg

(Athugið, athugið. Þessa færslu tekur smá tíma að rússa í gegnum því hér þarf dálítið ímyndunarafl og þann hæfileika að "vilja-og-geta-sett-sig-inn-í-aðstæður.")

Persónurnar eru tvær kelsur. Sú sem ég ætla að kalla ungfrú S er mjög svarthærð og óranslituð, augljóslega uppfull af hydroxi-kötti. Auk þess búin að halda sér á lífi dálítið lengi með Hollywood-kex-kúrnum. Hin er fimm barna með eindæmum hæglát húsmóðir sem ekkert er að stressa sig á materíalískum hlutum, en langar þó að komast í form eftir 5. barnið. Hún er ungfrú J. Og þær munu vera fullkomnar útlits-andstæður.

S (hangir uppi á bakkanum, vill ekki vera ofan í pottinum): Jée minn einasti hvað skín í dag..

J (veltir því fyrir sér hvort þessi hrikalega díva beini orðunum að sér, óbreyttri húsmóður úr Hlíðunum): Ehh.. já..það er nú meira..hehh

S (létt mont-í-röddinni): Maður bara hefur tekið heilmikinn lit og ég er ekki búin að vera hérna nema max 45 mínútur.

J (hefur lengi langað að spjalla við einhverja kvensuna í pottinum): Já, þú ert rosalega brún.. ee.. ertu alveg íslensk?

S (augljóslega afar ánægð með spurninguna): Ég get nú barasta sagt þér það að ég er hálfur Spánverji!

J (þykir gaman að vera um það bil að eignast erlenda vinkonu): Nú! það er þá svoleiðis..

S (langar skyndilega mjög að ræða uppruna sinn og ættfræðina): Ja það er nú bara þannig að ég er erfingi Andalúsíu-furstans Fernandez Mínero III í beinan föðurlegg.. hefurðu verið á Spáni?

J (lífið er að byrja að gefa henni fimmu með þessum nýju kynnum): Nei ekkert þannig.. við fjölskyldan höfum farið nokkur sumur til Mallorca. Krakkarnir kunna vel við sig í hitanum og mér fellur umhverfið ekkert illa. Síðan bjóða ferðaskrifstofurnar upp á alls kyns meiriháttar skoðunarferðir fyrir hópa og svona. Hmm.

Ég gleymdi að lýsa sundfatnaðinum og ytra útliti sem skiptir máli. Ungfrú S var í sebra-bikinii, með nýsnyrtar tá- og handneglur. Þar að auki var hún með risastór, svört sólgleraugu á sér allan tímann, svo nær ómögulegt var að sjá hvert hún var að horfa. Ungfrú J var með sirka 8 tónum ljósari húð og útþaninn líkaminn sómaði sér ágætlega uppvafinn og úttroðinn í settlega blómóttum sundbol.  

Þarna kom smá þögn og mér fannst á kvensunum tveimur að þær væru báðar að bagsa við að finna upp á nýrri spurningu sem allra allra allra fyrst. Hver sekúnda gat skipt sköpum og valdið því að samtalið rynni út í sandinn. Þær voru eiginlega eins og tvær úthafseyjur sem tilbúnar voru að leggja allt í sölurnar til að koma upp brú sín á milli til þess að eyða einsemdinni. Og mynda einhvern díalóg. Ungfrú J kastaði fram næstu spurningu. Til lukku með það.

J (hefur augljóslega garfað stutt í minninu eftir þessari): Hérna.. ert þú í einhverri líkamsrækt?
 
S (önnur góð spurning, að hennar mati): Já, elskaaaaan mín. Ég var einmitt að koma úr spinning, fer svo yfirleitt beint í laugarnar.

J (impressed): Já, er það? Er það ekkert erfitt?

S (áfram ánægð með farveg samtalsins): Nei, ég meina ekki þegar maður hefur verið þátttakandi í öll þessi ár.. svo er ég líka einkaþjálfari.

Þarna varð ungfrú J, hin óbreytta húsmóðir áhugasöm. Að vissu leyti urðu hér líka ákveðin vatnaskil í kynnum kvennanna, því að mínu mati hætti spjallið að vera yfirborðskennt með dass af óþægileika, sérlega fyrir áheyrendur og tók einhverja mjög dularfulla stefnu.

S (byrsti sig aðeins): Nei ég meina hvað heldurðu að ég sé gömul?

J (smá brugðið yfir nýfundnum ásökunartón): Tja.. nú veit ég ekki... ætli þú sért ekki á aldur við dóttur mína?

S (vill fá svar, lendingu og lokun, núna): Já, ég meina hvað er dóttir þín gömul?

J (aðeins að missa þráðinn og löngun til að tala við hinn konungborna hálfa-Spánverja sem var orðinn dálítið hostæl): Ja ég á nú þrjár en þessi sem ég er að vísa í er 35 ára..

S (gúterar það, kinkar stolt kolli, dómínerandi): Og heldurðu að það sé það sem ég er? 35 ára?

J (orðin skelfd): Já ég myndi giska á það, milli 35 og 40 ára..

S (skyndilega snappar eitthvað og ungfrú S stendur eldsnöggt upp, hrasar léttilega í leiðinni, rífur af sér sólgleraugun í miklu offorsi. Ég og börnin í lauginni fáum fullkomið slag þegar við sjáum hrukkum vafin augu hennar og dimmar þrár sem búa þar. Ungfrú S dregur andann mjög djúpt og hreint út sagt veinar neðanritaða ræðu yfir pottana og nærliggjandi svæði svo bergmálar um allan Laugardalinn):

ÉG GET NÚ BARA SAGT ÞÉR ÞAÐ AÐ ÞAÐ ER ENGINN HÆGÐARLEIKUR AÐ HLÚA AÐ "BODY" EINS OG ÞESSUM.

(þarna kom óborganleg handahreyfing þar sem frúin tillti sér fegurðardrottningarlega upp á hægri fót, stakk vísifingri hægri handar örsnöggt upp í munn sér, vætti hann létt og strauk honum svo frá ökkla upp á mitt læri. Og þá hélt hún áfram):

Á HVERJUM MORGNI SKOLA ÉG KLETTASALAT, LÆT VATN DRJÚPA AF ÞVÍ Í POTT - SÝÐ ÞAÐ VATN - OG DREKK. SVO BORÐA ÉG TVÖ HAFRA-KEX Í ÖNNUR MÁL. ÉG FÆDDIST EKKI SVONA EN ÉG DEY SVONA.

(grafar, grafar, grafarþögn í eitt augnablik 5-4-3-2-1 og svo):

OG ÉG SKAL BARA SEGJA ÞÉR ÞAÐ AÐ ÉG VERÐ FIMMTUG Á ÞRIÐJUDAGINN TAKK FYRIR!

(og í ennþá hærri og meira skerandi tíðni sem minnti helst á hrafn kláraði hún þátt sinn í lauginni):

OG VERTU MARGBLESSUÐ.

Og þar með strunsaði ungfrú S inn í klefana og sást ekki meira þann daginn. Á meðan þetta var að gerast höfðu andlit nærsvamlandi sundgesta breyst í fullkomin spurningamerki og það eina sem ég heyrði eftir mónólóginn tilkomumikla var þegar ungfrú J muldraði ofurlágt en eins og til afsökunar ofan í barm sér: hún er sko erfingi fursta frá Spáni..


 

Gjörningaklúbbur með flipp-, spuna- og skemmtiívafi var settur á fót í gærkvöldi. Fyrstu viðmiðunarreglur eru hér að ofan, blekið ennþá blautt þegar þessi mynd var tekin. Markmiðið er að búa til gjörninga, spunaleikrit og eins mikla skemmtun og efni standa til. Samhliða því að kanna hvað gerist þegar viðurstyggilega skapandi og skemmtilegu fólki er hrúgað saman. 

Brekkurnar möluðu sællega undan skíðarennslum Sverðkattar um helgina. Kristján L. Möller reyndi að hala inn atkvæði með að sneika notuðum lyftupössum að okkur. Jómfrúarferð Sessó í brekkurnar endaði þó með ósköpum. Þurfti að bera hana sárkvalna inn í Framhýsið. Vonir standa þó til að hún hafi endurkomu í brekkurnar innan skamms og muni þá jafnvel renna sér eins og eina ferð.